الوداع يا مدينة .. الوداع يا إم جي

بعد سنه طويله من صيف 2009 ل صيف 2010 ... سنه عدت في لمح البصر انا لسه فاكر اول يوم استلمت فيه الاوضه زي ما يكون امبارح ..
و بما ان دي اخر سنه ليا في الكليه ان شاء الله .. فمفيش مدينة تاني .. و مفيش طابور مطعم ... و لا دوشة الطرقة .. و لا سلم يهد الحيل .. و لا بصل على حوض الحمام و كانز في المبولة..و لا غربان في كل حتة .. و لا استغلال من كافيتريا .. حبيت اقول الوداع يا مدينة.
بس رغم كل دا و الله هتوحشني .. هتوحشني لمة الطلبة .. و جمال الشوارع و نضافتها .. و تنسيق الشجر و الزهور.. و التمشية كل يوم الصبح من المدينة للكلية .. معدي بقى على الجامعه و حديقة الاورمان و حديقة الحيوان و كوبري الجامعة و النيـــــــــــــــــــــل .. و جمال النيل و الدنيا فاضيه الصبح كدا الساعه 6 و لا 6.30

الله

مرحلة من حياة الواحد عدت بحلوها بمرها .. بذكرياتها و أنتختها .. و مذاكرتها و امتحاناتها .. و ربنا يكرمنا فيها ان شاء الله و تتم على خير و يوفقنا في اللي جي ..
تحية طيبة مني لكل العاملين في المدينة .. من الصغير للكبير .. للي بحبه منهم و بقدر شغله و اللي حتى مش طايقه .. تحيه طيبه .. اجدع سلام للرجاله اللي واخده بالها من الشجر و النجيله و الورد .. سلام كبيــــــــر
و للناس الطيبه اللي بتنضف المباني و بتلم القمامه و الناس الغلابه اللي بتلف على المباني تلم العيش و الحاجات اللي ممكن ربنا يرزقهم فيها ..
ياااااااه دنيا و موال و عالم التاني المدينة دي ... موظفين و عمال و عساكر و ظباط و مشرفين و كافيتريا و موردين و غلابه بتسترزق و غربان و قطط و طلبه .. يا عيني على الطلبة
تشوف العجب .. تشوف ابن الناس اللي هو بطبعه نضيف فبيحافظ على الحاجه .. و تشوف ابن 60*70 اللي كاسر حوض و اللي كاسر شباك و اللي سادد الصرف بقشر بصل و اللي بيقلي رنجه بعد نص الليل و اللي رامي كانز في المبوله و اللي و اللي .......
تشوف مصر بافرازاتها المخاطيه و عصارتها الهضميه و كمان الفكريه متجمعه ..
تلاقي الابيض خالص و ملوش في اي حاجه .. و تلاقي المتشدد .. و تلاقي الفاكك .. و تلاقي الملتزم المعتدل .. و تلاقي الاخواني و الوطني .. و تلاقي الصوفي و الفلسفي .. و تلاقي اللي غاوي كوره .. اهلاوي و و زملكاوي و اللي مش مقتنع بالاتنين ..
تلاقي اللي بيحب في التليفون و قافل شباك البلكونه عليه .. و تلاقي اللي بيكلم بنات ***** .. و تلاقي اللي مقضيها افلام .. و تلاقي بردو اللي منفض لكلك دا و بيذاكر علشان يرتب .. و تلاقي اللي بيقوم الليل و اللي مبيركعهاش ...
مصر جوا المدينه ... كل واحد بيعبر عن بيئته و ثقافته و تربيته..
نصيحه اي مسئول عايز يدرس شريحه من متنوعه من المصريين ينزل المدينة .. هيلاقي المنوفي و الكفراوي و الدمياطي و البحراوي و الشرقاوي و القليوبي و البورسعيدي و السويسي و الصعيدي و الصفي .... هيلاقي امة لا اله الا الله .. هيلاقي مسلمين و مسيحين .. و ممكن كمان يلاقي اللي دماغه لاسعه و بيشوف حاجه تانيه .. هيلاقي اوززز سنه اولى و شباب بكالريوس و رجالة سته طب .. اللي متحسرين كل ما ينزلوا اجازة البلد و يلاقوا زمايلهم خلصوا كليه من سنتين و مدخلوش جيش و شغالين و يمكن ركبوا عربيات كمان ..

الوداع لكل دا .. و يا اهلا بالحياة
zikus
هتسمعوا عني قريب ان شاء الله

الغربان في المدينة

اكيد كل الناس واخده بالها من الغربان المنتشرة في المدينة بكثرة .. و لا ابو قردان في الغيطان
دا جرس انذار :
ياريت المسئولين في المدينة ينتبهوا للنقطة دي و يحاولوا يتخلصوا من الغربان دي قبل ما تتكاثر و توصل لمرحلة زي ما حصل في السويس حاليا و الناس هناك بتعاني .. واي سويسي عارف اللي بقوله و ازاي الغربان هناك بقت و لا الدبان
يعني فريق الصيد و ضرب النار و النشان اللي في الجامعه يجي في الصيف يتدرب و يصيد في الغربان دي .. مش تبقى مصلحه للكل !!

سرقة في الكافيتريا

السرقة حدثت في الكافيتريا ( الكانتين ) اللي بيبع كل حاجه وبيستغلنا في كل حاجه بيبعها .. مش هما اللي اتسرقوا .. لا دا بيتقال ان هما _ احد العاملين بها _ هو اللي سرق .. و صاحب او مدير المكان تواطىء و حاول يداري عليه ..
ازاي دا !!

بيتقال ان فيه طالب ف كلية طب قاعد ف مبنى 15 كان في الكافيتريا و اتسرق منه موبايل n73 و هو هناك .. و اكتشف اختفاء الموب بمجرد دخوله المبنى .. و شك في احد العاملين في الكافيتريا لانه و زي ما اتقال كان بيحوم حوليه .. و لما راح كلم الواد انكر طبعا .. راح كلم صاحب الكافيتريا طرمخ على الموضوع و عمل خدوهم بالصوت ليغلبوكم .. الطالب اللي اتسرق موبايله يعمل ايه .. زي اي مواطن واعي راح اشتكى و بلغ عند حرس المدينة.. الناس مشكورين بعتوا جابو الواد المتهم و صاحب الكافيتريا اللي بينوا لماضه و شوية خباثة و بدل ما يدافعوا عن نفسهم او يرجعوا اللي اتسرق .. اتهم الطالب انه هو اللي سرق من الكافيتريا 500 جنيه !!
قال هما اللي اتسرق منهم .. الكافيتريا اللي لو مش مركز معاها ف الحساب هيشفطوك في ربع جنيه ف نص و لا حتى ف جنيه .. و اسأل مجرب ..
المهم الظابط ف الحرس قال للطالب لو حبيت تكمل الموضوع هنبلغ قسم الدقي و يبقى كلامك قصاد كلامه .. و دا اللي بايده يعمله طبعا .. الطالب خاف يكون فيها حجز و لا حاجه لما يروح القسم فتراجع في كلامه .. تاني يوم .. الحرس بعت ليه هو و صاحب الكانتين علشان يلموا الموضوع .. صاحب الكانتين خاف على سمعة المكان و حركة البيع و الشراء و استمرار نهر الاستغلال و مص الدم .. فقال للطالب :خلاص كأنه وقع منك عندنا و هنديك تمنه ..
الطالب قال: انا مش عايز فلوس .. انا عايز موبايلي او موبايل زيه بالظبط .. بس كدا .
و مشيوا و اتفقوا على كدا ..
يومها بالليل فوجىء اهلا لطالب في البلد باتصال من رقم ابنهم و واحد بيقولهم انه لقى الموب في الجنينه و انه في مبنى كذا و ياريت يبلغوا صاحب الموب انه يروح يستلمه ..
طبعا حركة مكشوفة جدا .. علشان يرجهوا الموب من غير ما يبان انهم هما اللى كانوا سارقينه
يعني اللي لقى الموب خلاه معاه يومين ليه و بعد كدا اتصل ؟؟
و كمان صاحب الموب قال انه اول ما وصل المبنى و ملقاش الموب اتصل عليه لقاه غير متاح .. يعني الشريحة كانت متشالة ؟؟!!
المهم الطالب راح و خد الموب و خلص ا لموضوع على كدا ..

الغرض من الكلام .. انه بجد حرام الاستغلال اللي العالم دول بيستغلوه لينا ..ياريت يا جماعه نقاطع الشرا من الكافيتريا دي شويه و نشوف نتيجة الاسعار بعد كدا .. الاسعار اللي اغلى بأكتر من 20 % و 30% من اسعارها خارج اسوار المدينة .

السلام عليكم

من اجمل الحاجات ف المدينه انه ثبت بعد الفحص العلمي و التدقيقي الجيولوجي ان كتير من طلبة المدينة بيقولوا لبعض السلام عليكم و هما بيقابلوا بعض ف الطرقه و لا على السلم او على مدخل المبنى .. و بتقل كل ما تتجه ناحية البوابة / او المطعم و هو شىء مفهوم.
جميل روح المحبة و المودة دي ..
و من ازفت و انيل الحاجات تعامل بعض الطلبة الزبالة م ع طرقات المدينة على انها شارع و ناصيه و ان الاوضه دي عازلة للصوت و تملي نسمع نهيق و جعير ناس و هي بتنادي على بعض زي ما يكونوا ف سوق و لا بيتخانقوا مع بعض زي العيال ( كله شتيمة شتيمة مفيش ضرب ) .. او حتى و هما بيلعبوا برو او بيضحكوا ..
حاجه مقرفة
امتى الناس دي تراعي اللي حوليها و تتصرف زي البني آدمين .. مش عارف !!

آسف على الالفاظ

واجب تحية كبيرة

تحية كبيرة واجبة لادارة الانشطة الطلابية بالمدينة الجامعية على المجهود الكبير اللي بتعمله هذه الادارة بجد ..
تنوع الانشطة و كثافتها .. و تلبيتها لجميع الرغبات .. و توزيعها على مدار الايام ما بين كرة قدم و كرة طائرة و مسابقات شطرنج و دوري معلومات بين فرق طلابية و رحلات
حاجه مفيدة فعلا

داخل المدينة

هي دي المدينة و هي نضيفه و فاضيه و رايقه

صوره و تعليق

المسجد اللي في مبني 15 دا بجد حاجه كدا زي واحة هدوء و راحة و ايمان .. ربنا يجزي الناس اللي قايمين عليه خير ..
ما شاء الله يعني.

ياريت مترميش العيش في الزباله حطه على جنبه كدا و خليك محترم علشان فيه ناس بتلف بعد الفجر تلمه و تسترزق منه فوفر عليه يمد ايده في الزباله و اكسب ثواب

ههههه شوف التعاون .. يا اه يا اه تيجي نتعاون و ننقذها .. قطط المدينة دي متربية على الغالي .. غدا فراخ و ساعات تونه و ف العشا عيش و جبن .. و حسب الدور اللي هي فيه ممكن تلاقي بواقي ساندويتش محترم و لا حاجه


ركن الصحافة .. اللي يركز هياخد باله ان الجرايد اللي بتتعلق يا اخبار يا اهرام يا جمهوريه .. و كمان مش كل الصفحات.. حجر صحي يا جماعه
محدش فكر يعلق هو مره المصري اليوم و لا الشروق بعد ما يكون جابه وقراه بدل ما هو بيرميه .. انا مقلتش الدستور.. اوك



العالم المتسغله اللي مغليين الحاجه 20 % و 30% عن تمنها برا المدينة .. احنا اللي شجعناهم على كدا .. زي ما احنا بردوا اللي سيبنا كل حاجه سلبية تكبر و تفرض شوطها علينا .. هيحصل ايه لو تتفق مع صحابك 3 ولا 4 ايام كدا تشتروا حاجاتكو من برا و تقرصوا الناس دي علشان تعرف ان الله حق و يراعوا ربنا.

السبوبه و اكل العيش

فكرت قبل كدا المدينة دي فاتحة كام بيت .. كام واحد بيشتغل فيها و كام واحد ليها مصالح معاها و كام واحد بيسترزق منها

ياااااااااااااااااااااااه دوووووول كتير اوووووووووووي

عد كدا معايا
من أول المدير و طقم الادارة و باقي الموظفين و المحاسبين و الكشف الطبي و بتوع الخازن و مسئولين الأنشطة و الرقابة و الاشراف
قشطه ... قشطه
و بعدين طقم الحراسه من اول مدير الحرس و طقم الظباط و الصولات و امناء الشرطه و العساكر
و بعدين تلاقي الطباخين في المطعم و المشرفين و عمال النظافة و الموظفين اللي بيستلموا الاكل و امناء المخازن عن الحاجات اللي متخزنة جوا زي زيت و سمنه و جبن و كدا
و فيه مين تاني .. امممم لسه يا عم فيه عندك ادارة الحدائق و المهندسين الزراعيين و الجناينيه
و فيه كمان في كل مبنى مشرف لكل دور و عمال نظافه و صيانه
الناس دي بتقبض مباشرة من المدينة

فيه بقى الناس اللي ليها بيزنس في المدينة زي مين !!
زي اصحاب المصانع و المجازر و المزارع اللي بيوردوا اكل لمدينة زي جهينة و انجوي و البوادي بتاعة الحلاوة و بريزيدون جبنة و المربى و الفراخ و المخابز بتاعة العيش و التجار اللي بيوردوا فول و عدس و قمح و كل الاكل دا .. دا غير العربيات اللي بتوصل سواقين و تباعين و هيصه
و الحج اللي بيبيع جرايد و كتب بعد بوابة المدينة.
و كمان فيه يا ريس الكانتين او الكافيتريا او العالم اللي واكلينها و العه .. اللي تلاقيهم خدوا حق استغلال المكان في جنينه من جناين المدينة ب 200 و لا 300 ولا كلفوا ايجار ولا مباني ولا حاجه و تلاقيهم كمان واخدين كهربا من كهرباء المدينة و بعد دا كله الحاجات يبيعوها اغلى عن تمنها برا في المحلات 20 % و اكتر ..

قمة الاستغلال

فيه بقى الناس الغلابه اللي ليها سبوبه في المدينة و مش كل الطلبة بتحس بيهم .. دول اللي بيلفوا بعد الفجر على المباني يلموا ارغفة العيش المحطوطه في الطرقة او اترمت في سلة المهملات .. عيش بقى على علب زبادي على اي حاجه ... اللي ينفع يتاكل منها يتاكل واللي يتباع يتباع زي علف و لا حاجه يعني اهم يطلعولهم ب 10 و لا 20 جنيه في اليوم علشان يقدروا يعيشوا..

حسيت انت بيهم و بدل ما ترمي العيش و سط كياس الشيبسي و سط تفل الشاي و اعقاب السجاير و عروق البصل الاخضر انك تحط العيش على جنب كدا هو و لو علبة زبادي او رز بلبن عدا وقتها .. مش هتخسر حاجه بس هتوفر على الراجل الغلبان دا انه يمد ايده في الزباله.

تابع سلوكيات الطلبة الزباله

يعني ابو فاسيه جنان دا اللي كل بصل و اداها ربنا مقدروش يرميه في الزباله بدل ما هو سايبه في الحوض كدا يقرف كل اللي داخل الحمام
بجد حاجه تخنق و تقرف و تجيب احباط من تحت الباط

تي شيرت مصري اصيل

التي شيرت دا صناعة مصرية و موجود في محل ملابس في طلعت حرب .. شايفين صورة بياع عرق سوس و هو بيصب عصير الغلابه لعيل شبه بكار من غير بنطلون و مكتوب
local egyptian wine
يعني خمر مصري محلي
......
و عجبي

هيحصل ايه لو ... !!

هيحصل ايه لو كل واحد بعد ما ياكل شال صينية الاكل و مسبهاش على الرتبيزة للعامل الغلبان يشيلها!!
......... أكيد هتكسب ثواب و تبقى حد محترم و ذوق و متربي و توفر على العمال انهم يلفوا المطعم كله و را كل بيه سايب صينية الاكل بتاعته مكانها.. و انت مش هتخسر حاجه مش تقيله يعني ما انت اكيد ماسحها مسح

هيحصل ايه لو الناس اللي اكلتها ضعيفه و لا وقت الغدا مكنش جعان خد اكل على قده و رجع الباقي للسرفيس!!
......... و الله هتوفر بتاع 10% من استهلاك الاكل خصوصا رز / مكرونة و الطبيخ .. و نرجع نقول الميزانية و الموارد .. مش معنى انك الاكل ببلاش يبقى يترمي ما هو بفلوس .. و محدش يقول ما هو الاكل كدا كدا اتعمل لا يا ريس .. لو الاكل كفى المطبخ هييجي على الساعه 3 و مش هيضطر يطبخ رز و لا طبيخ جديد.

هيحصل ايه بقى لو الأستاذة اللي في نادي الكمبيوتر اللي متسمي غلط _نادي التكنولوجيا_ خدت بالها ان اللي قدامها مش في حضانه دول طلبة جامعه فميش داعي للصوت العالي و لا يلا يا عيال !!
............ أكيد الناس هتبتدي متكرهاش و لا يلعنوا اليوم اللي حوجهم انهم يدخلوا المكان دا سواء بقى لشات ولا اغاني ولا حاجات مهمه زي نتايج و محاضرات و اخبار.. يا ريتها بس تقرا و تعمل بالكلام.

هيحصل ايه لو الناس بطلت يومين تشتري من الكافيتريا .. المستغل اللي بيرفع سعر الحاجه عن خارج المدينة بتاع 20% و مرات اكتر من كدا
........... اكيد اصحاب الكانتين سواء اشخاص و لا ناس تبع المدينة هيراجعوا نفسهم و ضميرهم .. يا راجل دي الناس برا بتأجر مكان و بتدفع كهربا و ضرائب و محليات و الكلام دا كله و ارخص منك اللي انت عامل عشة و اكيد و اخد كهربا من المدينة و لو بتدفع خلو رجل للمدينة حق استغلال المكان يعني مش هيجي نص ايجار محل 4 متر * 4 متر برا..
ياريت الطلبة تجربها بس يومين كدا تقول لصحابك و اللي معاك في الطرقة تشتروا اللي انتوا عايزينه من برا و شوفوا هيحصل ايه !!

العالم اللي واكلينها و العه و احنا اللي مشجعينهم على كدا .. قارن سعر اي حاجه بتشتريها من الكانتين دا و سعرها برا .. مش هقولك في بلدكو اللي هي اكيد ارخص بكتير لا يا سيدي بسعرها برا المدينة قصدا الجامعه يعني في حته ايجار المحل بالشىء الفلاني.. هتلاقيها برا ارخص مش اقل من 20%
ينفع!!!!

حد دخل النت في النادي دا؟! ايه رايك.. بيضان و لا جنان !! لا بجد هي الفكرة كويسة .. و زي قبل كدا ما قلت السيستم لما يبقى واعي بيعمل حالة نجاح جامدة جدا زي ما بيحصل في الجنانين و معرض الزهور.. انم كمان السيستم لما يبقى متزمت و مش واعي بيعمل حالة فشل و خنقة زي ما هو حاصل نادي النت البطيء الغير اجتماعي.. سيبك من ان عدد الكمبيوترات مش كافي .. و ان القاعة و انت داخل شايف مواسير الصرف .. و سيبك من دايما تلاقي فيه اجهزة بايظه مش عطلانة لان بالفعل فيه اجهزة شغالة و زي الفل و حديثة اللي خانقني بجد هو اسلوب التعامل.. في الحجز و في الوقت و في نظام الدخول يعني موضوع انك تدخل بالملابس الرمسية زي الاوبرا .. دا اوكى مفيش مشكله ابقى لابس لبس خروج.. انما فيها ايه لو لابس جينز و تي شيرت على شبشب لازم جزمة و لا كوتشي .. هو انا كدا خدشت حياء الانسه اللي هناك؟؟.. و لا الناس اللي هناك من العصر الحجري ومش عارفين ان فيه سيلبرز غاليه ناس بتروح بيها الكليات !! ثانيا حجز الوقت .. لازم تدخل من 10 ل 11 و من 11 ل12 و كدا يعني .. لو جيت 10.30 تدخل اه لكن تخرج 11 مع الناس كلها و كأنها قاعة سينما و الفيلم خلص و كله بخ .. فيها لما بحبة مجهود يرقموا الاجهزة و كل رقم يتسجل دخول امتى و الخروج امتى و خلاص .. و لا يبقى فيه شوية ذكاء و يعملوا زي بقية السيبرات و يعملوا تايمرز .. يعني من الجهاز الرئيسي و الطالب داخل على الجهاز رقم كذا من الجهاز الرئيسي تفتح الجهاز و توقت هيقفل امتى ثالثا و دا الاهم اسلوب التعامل: و وكانها ثكنة عسكرية .. صوت عالي و اوامر و بيتعاملوا معانا و كأننا عيال و تلامذة مش طلبة جامعة .. و فعلا فيه هناك سيدة استاذة محترمة دايما صوتها عالي_ياريت تاخد بالها ان صوتها عالي لو مش عارفه_ دايما بتتكلم مع الطلاب اللي على الاجهزة يلا يا عيال الساعه خلصت علشان زمايلكوا على الباب..عيال !!! اللي جبرني ادخل هذا المركز رغم تحذير اللي معايا في الاوضه من البيضان اني كنت محتاج حاجات على النت و الواير بتاع حاسبات كان قفل .. انم الحمد لله فيه و اير دلوقت قدام المسجد .. يا ترى دا منين ؟؟ حد يعرف؟!

سمعت عن إشاعة زيت الكافور في الأكل

يا ترى سمعت عن اشاعة الأكل في المدينة بيحطوا عليه زيت كافور و لا مسمعتشهاش؟؟
بيتقال: انهم في المدينة بيحطوا على الأكل زيت كافور و دا علشان يهدي الناس يعني علشان الطلاب متسخنش على بعض.. شباب بقى و المدينة زي المعسكر فممكن..... كدا يعني"
انا رايي ان الاشاعه لها أصل و هي انهم ممكن يكونوا بيعملوا كدا بس دا في الجيش مش هنا.. في الجيش في حبسه و الناس بتقعد بالاسابيع و ممكن شهور متنزلش .. و مبيشفوش حريم .. انما في المدينة انت كل يوم في الشارع
اه و كمان لو تاخد بالك ان العمال و المشرفين و الموظفين في المطعم بياكلوا من نفس الاكل .. فمش معقوله المشرف ياكل اكل بزيت الكافور و يروح البيت من هنا يبقى مع مراته .. مفيش.. و لا انتم رايكم ايه!!

معرض الزهور 2010

من الحاجات الرائعه في المدينه فعلا تنسيق الجناين و قصات الشجر و توزيع الزهور و المشاتل في المدينة .. فعلا نشاط مميز و مجهود طلبه كتير مش واخده بالها منه .. المجهود دا مخلي ادارة الجناين و المشاتل و الزهور في المدينة تفوز ل 5 سنوات على التوالي بجائزة معرض الزهور ..
المعرض كان امام المسجد بجوار النافوره و زي ما هو واضح في الصور كان توزيع الزهور بشكل جمالي و محترف .. صحيح مكنش فيه زهور بريحة (لا ورد بلدي و لا ريحان و ..... ) لكن لما سألت عرفت ان دا علشان فيه طلبه للأسف قبل كدا كانت بتقطع الحاجات دي فمينفعش يعرضوها ..
اللي عرفته بس و حبيت اقوله ان ورا المجهود دا ادارة فعلا عاقله و واعية .. لانه زي ما عرفت مدير نشاط الزراعة و التنسيق دا منسق عمل الجناينيه من الساعه 6 لحد 12 لان معظمهم فلاحين و عندهم اراضي عايزين يراعوها .. لكن في المقابل ال 6 ساعات دوول شغل شغل .. فهو مريح العمال في مقابل الحصول على نتيجة و عمل فعلي مش انتخه و يضحك على روحه انهم يقعدوا للساعه 2 ولا 3 و ميشتغلوش

زي ما قلت قبل كدا العيب في السيستم .. بردوا الحل و النجاح في السيستم الواعي

بالذمه دا منظر

( لا اله الا الله .. يرضي مين دا بس .. هي الناس اللي متشعلقه على عربية الزبالة دول مش بني آدمين ولا ايه ؟؟ مش كفايه بيشيلو الزباله بايديهم لا فيه قلاب و لا زفت .. كمان يترموا ورا عربية الزبالة بالشكل دا ..)

دورة اصلاح الإجهزة الكهربائيه و المنزلية

من غير تريقه و لا اي حاجه المدينة فعلا بتعمل انشطه طلابية كتيره و فيه حاجات مفيده فعلا زي الدورة اللي ادارة النشاط في المدينة بالمبنى الخامس اعلنت عنها (ا\سامي مدير النشاط بالمدينة ) .... دورة لمدة 3 اسابيع لاصلاح و صيانة االاجهزة الكهربائية و المنزلية .. و الاشتراك مجاني .. و في نهاية الدورة بيحصل المتدربين على شهادة بالحصول على الدورة من وزارة التضامن الاجتماعي .. كما يحصل الفائزين بالمراكز ال5 الاولى على جوائز نقدية قيمة ..
صحيح قيمة دي ممكن تلاقيها في الاخر 50 جنيه بس مش مشكله
المشكله بقى الفشل الفعلي في تنظيم هذه الدوره .. يعني تم تسجيل اكثر من 150 مشترك و هي كل سنه بتاخد حوالي 15 واحد فقط وبدون تنبيه عند التسجيل ..فتخيل الزحمة في االأوضه مش قاعة طبعا اللي مفيهاش مروحه و مليانه بأكتر من 70 واحد دول اللي حضروا
والتهريج و الخلاف اللي حصل علشان تقسيم الدوره لان 70 مينفعش ياخدوا مع بعض و تتحقق استفاده فعليه
و قعدنا منتظرين الباشا الباشمهندس الدكتور المدرب على مايجي لحد الساعه 2:40 و ميعاد الدوره اصلا الساعه 2
ف بصراحة زهقت و قمت و حلفت مش هحضرها
و يتوالى مسلسل فشل التنظيم .. زي اي مكان في مصر العيب في السيستم

النضيف نضيف

(سيبك انت النضيف نضيف .. الطرقه دي فضلت نضيفه كدا يومين لدرجة ان العمال ممسحوهاش اصلا لانها مش محتاجه )

تابع سلوك الطلبه الزباله

هو ميبقاش زباله لو عنده رعشه و وقعت منه .. غير كدا و يعمل ببي كدا يبقى زباله

( حوض مسدود بتفل الشاي و التاني مسدود بالصابون و اللي بعده حنفيته مخلوعة ولا مسروقة و الرابع الحوض نفسه مكسور من النص أموت واعرف كسره ازاي دا.. ) لو اللي كسره شاف الصوره ياريت يعرفني

(يعني بعد فتلة الشاي ما اترمت في الحوض و دلوقت علب التونه انا خايف الاقي بعد كدا واحد عامل ببييييي في الحوض )

وكر الانترنت

من بعد المغرب كدا و لحد الساعه 12 ولا 1 باليل تيجي هنا تلاقي الدنيا منوره بشاشات اللاب توب و عيش و سيبني اعيش
سؤال بس ليه المدينة ما توفرش شبكة نت لاسكلي ليها هي و مش هتكلفها كتير ولا حاجه (هما مش بياخدو مننا 65 ج بحالهم ولا ايه ) يعني بدل الناس ما بتنزل من اوضها مخصوص علشان ينزل حاجه ولا يقرا خبر و لا يشيت مع مزه او ناس بتكلم اهلها و خصوصا الجماعه اللي مش من مصر .. عادي يعني ولو فيه قلق من حاجه يمنعوا المواقع البورنو_الاباحية بالفصحى_ من السيرفر من عندهم .. مش كدا احسن و اريح!!

سلوك الطلبه الزباله

طيب ما السله جنبه و فاضيه ولا لازم نرمي على الارض

مش انا اللي فاتح الحنفيه على فكره .. دا واحد كسل يقفلها بس

(بدون تعليق)

( فتلة الشاي مكانها مش هنا .. اقولك فين !! )

المطعم

من كتر ما المطعم دايما زحمه ما بناخدش بالنا ان مطعم المدينة تصميمه حلو و منظم و على شكل العماره الاسلاميه .. لكن المشكلة في الاشراف و الإدارة القائمة عليه .. مفيش تنظيم كفايه مع حقيقة ان فيه مجهود كبير بيبذل
لكن النتيجة ... طوابير و خنقة و مرات الاكل مبيكونش مستوي كويس و ساعات اللي بيوزع فراخ بدل ما يدي ورك مره و صدر مره لأ يدي وركين ورا بعض و يعين الصدر .. لمين بقى ؟ يمكن لحد يعرفه لما يجي دوره او لحد يتحايل عليه شويه و يتصعبنله انه من ساعة ما دخل المدينة بيحلم بالصدر .. او يمكن علشان اللي جه عليه الدور ياخد الصدر شكله طيب و هيسكت

مبنى 15

مبنى 15 فخر الصناعة المصرية
بجد مش بهزر .... تصميم المبنى دا حاجه تشرف و الله العظيم هي المقاولون العرب كدا بتاعة التقيل كله و تحية مني للمهندس الاستشاري للمشورع محمود عويضه على ما اتذكر
تصميم الغرف و توزيع الحمامات و شطرة المبنى علشان البحري و مراعاة اطوال الاجنحه المختلفه
بجد شغل عالي

ناس معندهاش دم

اه فيه ناس كدا فعلا معندهاش دم .. و من غير ما حد يزعل تسموا ايه اللي بيقعد ياكل في المطعم سواء غدا بقى و لا عشا و يقوم و يسيب صينية الاكل على الترابيزة او يفضل مأنتخ على الكرسي بيتلكم مع اللي جنبه لحد ما يجي العامل الغلبان يشيل الصواني من قدام البهوات
!! دا اسمه ايه !!
مش قلة ادب و تخلف .. مع انهم مش كتير بيعملوا كدا بس منظر يفور الدم
مرتين حصل الموضوع دا قدامي و انا عندي وقت و مش مستعجل يعني .. الاول كلمت الاخ و قولتله اللي فيها و مش هتخسر حاجه لما تشيل الصينيه و انت قايم على الاقل تكسب ثواب في العمال دول .. و فعلا ابتسم و اُحرج و شال الصينيه .. المره التانيه كان لمض وقليل الذوق شويه و رد عليا " امال هما العمال دو شغلتهم ايه " .. اه فيه ناس كدا فاكره انها بال 65 جنيه اللي بتدفعها كل شهر اشترت المدينه بالموظفين و العمال اللي فيها ..
هيجرى ايه يعني لما الناس بعد ما تخلص أكل بالهنا و الشفا تاخد الصينيه معاها .. مبقولش تمسح مكانك الترابيزه دا على فرض انك لسه عيل و بتوقع حوليك ..
انا كلامي مش موجه لكل محترم بيشيل الصينية معاه و هو ماشي لإن دول ناس ولاد اصول و تربيتهم كدا و مش محتاجين حد يوجههم .. ولا كلامي بردوا للعالم الجبلات اللي معندهاش دم ولا بتحس
انا كلامي لزمايلنا اللي ممكن بينسى او مبياخدش باله او ساعات بيكسل مش اكتر .. يا ريت لا تنسوا ولا تكسلوا ربنا يكرمكم